ॐ श्री साई वसंतसाईसाय नमः

पुष्प एकवीस 

जेव्हा भाव कृतीत उतरतात

१४ ऑक्टोबर २००५ ध्यान

वसंता - स्वामी, मी लेखनकार्य पूर्ण केले असे तुम्ही म्हणालात. आता तुम्ही स्वतःला मला देऊन टाका.
स्वामी - हे कार्य भावनिक पातळीवर पूर्ण झाले आहे. आता ते कृतीत उतरले पाहिजे हो की नाही ?स्तूपाचे काम पूर्ण झाल्यावर हे घडेल. जेव्हा आपण परत येऊ तेव्हा तुझ्या सर्व भावनांची मी परतफेड करेन. आतापर्यंत जे अवतार होऊन गेले त्यांनी धर्म संस्थापना केली. सर्वजण त्यांच्या कृतीचे साक्षीदार होते परंतु कोणालाही त्यांच्या भावनांविषयी माहिती नव्हती. राम, कृष्ण आणि मी आमचे भाव कोणीही पाहिले नाहीत. जेव्हा आपण परत येऊ तेव्हा तुझ्याविषयीचे माझ्या मनातील भाव मी उघडपणे व्यक्त करेन. तू म्हटलेस की प्रकृतिच्या अंगप्रत्यंगामध्ये तुझे प्रेम प्रवेश करेल. प्रत्येक गोष्टीतील सत्यावर तुझे प्रेम आघात करेल, सर्वांमधील सत्याला हलवून सोडेल. सत्य जागृत होऊन प्रेमाद्वारे कार्य करण्यास आरंभ करेल.

ज्ञान 

            माझा प्रेमभाव सर्वांमध्ये प्रवेश करून सत्यतत्वास जागृत करेल. स्तूप स्वामींच्या आणि माझ्या दैहिक एकात्मतेचे प्रतिनिधित्व करतो. ह्याचा नेमका अर्थ काय ?
           मी साधना केली आणि वसिष्ठ गुंफेमध्ये स्वामींशी माझा योग झाला. पंढरपूरमध्ये शरीर निवेदनम् म्हणून स्वामींना मी माझा देह अर्पण केला. त्यांनी त्याचा स्वीकार केला म्हणून ह्या शरीरामधून केवळ तेच कार्य करतात. आमचे देह एक आहेत. ह्या देहामधून उत्पन्न होणारी स्पंदने स्तूप खेचून घेतो आणि ती अखिल विश्वामध्ये प्रसूत करतो. अशा तऱ्हेने हा देह स्तूपाद्वारे कार्य करेल. प्रेम समस्त सृष्टीमधील सत्याला जागृत करेल.
           सत्य हे सर्वव्यापी परमेश्वर तत्व आहे. प्रेमाच्या कमतरतेमुळे कोणत्याही युगामध्ये सत्य स्वतःला पूर्णत्वाने प्रकट करू शकले नाही. द्वापार युगामध्ये सुरु झालेली प्रेमाची कमतरता अजूनही सुरूच आहे. वाईट स्पदंनांच्या आवरणाने परमेश्वर तत्वास झाकून टाकले आहे. जेव्हा माझ्या प्रेमाचा परमेश्वर तत्वाशी संयोग होईल तेव्हा वैश्विक परिवर्तन घडेल आणि त्यामुळे विश्वव्यापी परमेश्वर प्रकट होईल.
            प्रत्येकातील दिव्य प्रवृत्ती सुप्तावस्थेत आहे, निष्क्रिय आहे. प्रेम सत्याला, दिव्य चैतन्याला जागृत करेल. प्रेमाची स्पंदने सत्य तत्वाला कार्यान्वित करतील.
             परमेश्वर अस्तित्व अवस्थेत आहे. निष्क्रिय अवस्थेत आहे. जेव्हा त्याची चित् शक्ती , प्रेमाशी त्याचा संयोग होईल. तेव्हा तो कार्य करण्यास सुरुवात करेल. अशा तऱ्हेने प्रेम तत्वाने गतिमान होऊन प्रत्येकामधील सत्य तत्वाला जागृत केल्याने, दिव्यत्वाने व्यापलेल्या सत्ययुगाची पहाट होईल !
            अवतारांनी धर्मसंस्थापना करण्यासाठी अनेक कार्ये केली परंतु त्यांनी त्यांच्या कुटुंबियांपाशी मोकळेपणानी त्यांचे भाव व्यक्त केले नाहीत. जेव्हा आम्ही परत येऊ स्वामी तिन्ही अवतारांच्या भावांचे मूर्तिमंत स्वरूप असतील. पूर्वी अवतारांनी कृतीद्वारे धर्मसंस्थापना केली. हा अवतार भावांद्वारे प्रेम संस्थापना करेल.
            आतापर्यंत आपण माया जीवनाविषयी पाहिले आता आपण निर्मितीविषयी पाहू.
            प्राण आणि आकाश एकमेकांवर आघात करतात आणि निर्मितीचा श्रीगणेशा होतो. जेथे प्राण आणि आकाश नाही अशी कोणतीही जागा नाही. जेव्हा त्या दोन्हीचा संयोग होतो तेव्हा पर्वत, वृक्ष, नद्या, सागर ह्यांच्या सहीत विश्व दृश्यमान होते. प्रलयानंतर ह्या निर्मितीचे आगमन होते. तथापि नवनिर्मिती याहून वेगळी आहे, कशी ? प्रेमाने सत्यावर आघात केल्याने प्रलयाविना नवनिर्मिती होईल प्रेम आणि धर्म ह्यांच्या अभावाशिवाय पशुतुल्य जीवन जगणाऱ्यांमध्ये सुपरिवर्तन घडेल. सर्वांमधील आत्मतत्व जागृत होईल. प्रेमाचा आत्मतत्व सत्याशी संयोग झाल्यामुळे हे घडेल.  प्रेम आणि सत्य ह्यांच्या संयोगाने प्रत्येकामध्ये परिवर्तन घडून नवजागृती येईल. ही नवनिर्मिती आहे हे सत्ययुग आहे.

संदर्भ - श्री वसंत साईंच्या ' प्रेमसाई प्रेमावतार ' ह्या पुस्तकातून.

जय साईराम