ओम श्री साई राम                              
                                    पुष्प चौथे पुढे सुरु

६ ) विद्वत्ता - याचा अर्थ वेद आणि धर्मग्रंथ पंडीत. तथापि तुम्ही एक विद्वान पंडीत आहात असा अहंकार बाळगत असाल तर ते अत्यंत चुकीचे आहे . एकदा जनक राजाच्या दरबारात अनेक विद्वान पंडीत विवाद करण्यासाठी जमले होते . त्या विवादामध्ये जो पराजित होईल त्यास शिक्षा करण्यात येईल असा या विवादासाठी नियम होता . अष्टवक्राने दरबारात प्रवेश केला . त्याचे शरीर आठ ठिकाणी वाकडे झाले होते . त्याला पाहताच सर्व पंडीत हासून म्हणू लागले , " आपल्या सारख्या विद्वानांसमोर ह्या मुलाचे काय काम ? " अष्टवक्र उत्तरला ," मी तुमच्या बरोबर  विवाद करण्यासाठी येथे आलो आहे . माझ्या बाह्य रुपाकडे पाहून माझ्या विषयी मत बनवू नका . " त्या नंतर त्याला जे जे प्रश्न विचारण्यात आले त्याची त्याने अचूक उत्तरे दिली . त्याने सर्व विद्वान पंडीताचा अहंकार मोडून काढला. म्हणून विद्वत्तेच्या अहंकाराचे उच्चाटन केले पाहिजे .      

        प्रत्येकात दैवत्व वास करते . ते कसे आणि कोणामधून प्रकट होईल हे आपण सांगू शकत नाही . स्वामींनी एकदा मन्सूर नावाच्या मुलाची एक गोष्ट सांगितली . तो एक लहान मुलगा होता त्याला त्याच्या खऱ्या  स्वरूपाचे ज्ञान झाले होते . त्याने घराचा त्याग केला आणि ' मी परमेश्वर आहे , मी परमेश्वर आहे ' असे तो सतत म्हणत  होता. रस्त्यावरून चालतांना तो जाहीर पणे  म्हणत होता , ' मी परमेश्वर आहे , मी परमेश्वर आहे ' . अनेक पंडीतांच्या हे कानावर आले. त्यांनी त्याला कडक शब्दात असे म्हणू नये म्हणून सांगितले . ते म्हणाले , " असे म्हणू नकोस . तू परमेश्वर कसा बनशील ? " तरीही त्याने आपले म्हणणे चालूच ठेवले . अखेर त्यास राजाकडे नेण्यात आले . राजा म्हणाला , " हे बालका , तू तर खूप लहान आहेस तू असे म्हणू नयेस . " तो उत्तरला , " मी परमेश्वर आहे . " राजा क्रोधीत झाला व त्याने त्याचे डोळे फोडण्याचे फर्मान सोडले .तो मुलगा अंध झाला तथापि त्याने त्याचे 'मी परमेश्वर आहे ,मी परमेश्वर आहे ' . हे म्हणणे चालूच ठेवले .त्यानंतर त्याचे  हात पाय  तोडण्यात  आले . त्याच्या  देहावरून रक्ताचे पाट  वाहू   लागले.   तरी  त्याच्या देहातून  त्याचे बोल  ऐकू  येत  होते . त्यानंतर  त्याचे   प्राणोत्क्रमण  झाले   आणि  त्याच्या   देहाला  अग्नी  देण्यात  आला . त्याच्या   चितेतील  राखेमधुनही 'मी  परमेश्वर   आहे ' हे  बोल ऐकू  येत  होते  .यावरून   दिसून   येते   की   त्याला   परमेश्वराचा  बोध  झाला   होता . त्याच्या देहातील प्रत्येक अणुरेणु मधून ' मी परमेश्वर आहे ' हा ध्वनी निनादत होता . म्हणून विद्वत्तेचा काय उपयोग ? त्या पंडितांनी त्यांच्या  विद्वत्तेच्या   अहंकारापायी  एका खऱ्या संताला  जीवे  मारले  .  स्वामी ,   तुम्ही आम्हाला  किती त-हेने  उपदेश  आणि  बोध  करता ! किती  उदाहरणे   देता  .  हे  मानवी   मन  जागृत  होईल  का ?  विद्वत्तेच्या  अहंकारामुळे एका  संताच्या  हत्येचे  पाप  त्यांच्या  माथी आले  . म्हणून  आपल्या मानवी  बुद्धीने आपण सत्याची पारख करू शकत नाही . 
                  उर्वरित वसंतामृत पुढील भागात .......