ॐ श्री साई वसंतसाईसाय नमः 

सुविचार 

        " परमेश्वरावर प्रेमाचा वर्षाव केलात की तुमच्याकडे खऱ्या प्रेमाचा चेहरा असेल."

प्रकरण चार 

आध्यात्मिक प्रगतीचे टप्पे पुढे सुरु 

५ मार्च १९७६ 
                 आज मी स्वामींना पहिले पत्र लिहिले. 
२५ फेब्रुवारी १९८२ 
                स्वामींनी विभूती पाठवली आणि त्यांचा आमच्या घरामध्ये वास आहे सांगितले. 
                माझा भरत नावाचा एक चुलत भाऊ मुंबई येथे पर्यटकांचा गाईड म्हणून काम करतो. एकदा त्याच्या ऑफिसमध्ये दोन विदेशी पर्यटक आले. त्यांना पुट्टपर्तीला जायचे होते. भरतला इंग्रजी, हिंदी, तमीळ आणि तेलगू या चारही भाषा अवगत असल्याने त्याला त्यांच्या बरोबर जाण्यास सांगितले गेले. पुट्टपर्तीत पोहोचल्यावर ह्या दोघांना स्वामींनी मुलाखतीसाठी बोलावले. " स्वामींनी मला का बोलावले नाही " असे म्हणून गणपतीसमोर बसून भरत रडू लागला. त्याचक्षणी एक स्वयंसेवक पुढे आला व त्याने विचारले, " भरत कोण आहे ? स्वामी त्याला बोलावत आहेत " तो आनंदाने आत गेला. स्वामी त्याला म्हणाले, " तू त्यांच्यासोबत टूरवर जाऊ नकोस, तुझा मुलगा आजारी आहे. तू घरी परत जा." स्वामी पुढे म्हणाले, " तू नेहमी मुंबईला जाण्यापूर्वी काकांच्या घरी जातोस. ते तुला खडीसाखर देऊन आशीर्वाद देतात. माझा त्या काकांच्या घरामध्ये वास आहे. मी तुझ्या गावाला येईन पण काही काळानंतर, इतक्यात नाही." स्वामींनी भरतला विभूतीच्या पुड्या दिल्या. मुलाखतीनंतर विदेशी पर्यटकांची रजा घेऊन भरत वडक्क्मपट्टीला परतला. तो आमच्या घरी आला. त्याने स्वामींचा प्रसाद दिला व सर्व हकिकत सांगितली. हर्षभरीत झाल्याने माझ्या डोळ्यातून आनंदाश्रू वाहू लागले. घरातल्या सर्वांनाच खूप आनंद झाला.
                 गावातील सर्व तरुणांना माझे वडील अध्यात्माचे धडे देतात. नोकरी वा उच्चशिक्षणानिमित्त परदेशी जाताना सर्वजण माझ्या वडिलांकडे येऊन त्यांचे आशीर्वाद घेतात. माझे वडील नेहमी त्यांना श्रीरंगमचा प्रसाद ( खडीसाखर ) देतात. हेच स्वामींनी भरतला मुलाखतीत सांगितले. 
                 १९८२ साली स्वामींनी माझ्या नातेवाईकाला मुलाखत देऊन त्यांचा आमच्या घरात वास आहे आणि ते आमच्या बरोबरच आहेत असे सांगून आमच्यासाठी विभूती पाठवली. या प्रसंगाची मी आनंदाने पुन्हा पुन्हा उजळणी करते.

उर्वरित प्रकरण पुढील भागात 

जय साई राम

          
 

ॐ श्री साई वसंतसाईसाय नमः 

सुविचार 

            " जर तुमच्यामध्ये व्यक्तिगत आवडीनिवडी, इच्छा, अहंकार यांचा काकणभर अंश शिल्लक असेल तर सत्याचे पूर्णांशाने दर्शन होणार नाही. "

प्रकरण चार 

आध्यात्मिक प्रगतीचे टप्पे पुढे सुरु 

३ जानेवारी १९७६
                   आज प्रथमच थिरपातुरच्या डॉ. मनोन्मनींकडून स्वामींचा प्रसाद मिळाला. स्वामींच्या भक्त डॉ. मनोन्मनी ह्या मदुराईमध्ये वैद्यकीय व्यवसाय करतात. एक निष्णात डॉक्टर म्हणून त्या गावात प्रसिद्ध आहेत. माझा जन्मही त्यांच्याच हॉस्पिटलमध्ये झाला. थिरपातुरमध्ये माझे काका काकू हॉटेल चालवतात. माझ्या काकू अत्यंत भाविक आहेत. डॉक्टरांचे कुटुंब साईभक्त असल्यामुळे त्यांच्या घरी साप्ताहिक भजन असते. दर महिन्याला जोलारपेटचे भजनी मंडळ तेथे येऊन भजन गातात. माझ्या काकाकाकूंकडून मला या सर्व गोष्टी माहीत होतात. जेव्हा जेव्हा ते वडक्क्मपट्टीला येतात तेव्हा ते डॉक्टरांच्या घरून विभूती घेऊन येतात. एकदा त्यांनी सनातन सारथीचा एक अंक आणला. त्यांनी माझा पत्ता व ५ रुपये वर्गणी घेऊन डॉक्टर मनोन्मनींकडे दिली. त्यांनी ती पुढे प्रशांती निलयम येथे पाठवली. त्यानंतर दर महिन्याला मला सनातन सारथीचा अंक मिळू लागला. 
                  सनातन सारथीच्या वाचनानंतर माझे वडील आणि आजी यांनी स्वामींचा साक्षात् नारायण म्हणून स्वीकार केला. स्वामी माझ्या आजीच्या स्वप्नात येऊन कौटुंबिक व आध्यात्मिक विषयांवर बोलत असत. 
                   माझा जन्म डॉ. मनोन्मनींच्या मदुराईमधील हॉस्पिटलमध्ये झाला. त्यांच्यामुळेच माझा पुनर्जन्म झाला. स्वामींविषयी माहिती मिळाल्यामुळेच हा पुनर्जन्म झाला. त्यांनी मला नवीन जन्म दिला. ज्यांनी मला या जगामध्ये आणले. त्याच आता मला या भौतिक जगाच्या बेड्यांतून मुक्त होण्याचा मार्ग दाखवत आहेत. 

उर्वरित मजकूर पुढील भागात .....

जय साईराम

ॐ श्री साई वसंतसाईसाय नमः 

सुविचार

" अखंड प्रामाणिक प्रयत्नांद्वारे परमेश्वरी कृपेचा लाभ होतो."

प्रकरण चार 

आध्यात्मिक प्रगतीचे टप्पे

 

                 " मी माझ्या प्रेमभावाचा वर्षाव केला आणि तो साईकृपेच्या जलाने वृद्धिंगत झाला." 

पथावरील आध्यात्मिक टप्पे : १९७४ ते १९९३ 

३० मे १९७४
                माझ्या चुलत भावाने मला सत्य साई बाबांवर लिहिलेल्या एका पुस्तकाविषयी सांगितले मी श्री. कस्तुरींचे ' सत्यम शिवम सुंदरम ' वाचायला सुरुवात केली. मला पूजा करण्यासाठी स्वामींचा एक फोटो हवा होता. त्यासाठी मी अखंड प्रार्थना करत होते. 
६ नोव्हेंबर १९७५ 
               आज गुरुवार आहे, मी स्वामींचा छोटा फोटो देवघरात ठेवला. 
१९ नोव्हेंबर १९७५ 
               आज स्वामी प्रथमच माझ्या स्वप्नात आले. 
२८  नोव्हेंबर १९७५ 
              स्वामी माझ्या स्वप्नात आले. त्यांनी माझ्या कपाळाला विभूती लावली आणि ते म्हणाले, " मी तुला कधीही अंतर देणार नाही. शेवटपर्यंत मी तुझ्याबरोबर असेन."

उर्वरित प्रकरण पुढील भागात ..... 

जय साई राम 

 

ॐ श्री साई वसंतसाईसाय नमः 

सुविचार 

" परमेश्वराला त्याच्या इच्छेनुसार तुमचे जीवन चालवू द्या."

प्रकरण तिसरे 

मूळ पुढे सुरु 

                   तुम्ही सहजगत्या याचे अनुसरण करू शकता. जे जे काही आपण पहातो किंवा करतो ते परमेश्वराशी जोडायचे. तोडणे आणि जोडणे याची काही उदाहरणे खाली देत आहे. 

Computer - Contemplatic on Her 

Gooseberry - Go inside ... Hurry 

Thursday - Everyday is thurst day for Swami 

Hospital - Heart Sai Petal 

Cotton - Caught on Sai love 

Bathroom - Bath through om 

                   २४ तास परमेश्वराच्या अनुसंधानात राहा. हेच तप आहे. त्यासाठी तुम्हाला वनात वा गुहेत जाण्याची आवश्यकता नाही. कठोर व्रतवैकल्ये, उपास तापास करण्याची गरज नाही. जे काही कराल ते कृपया परमेश्वराचे स्मरण करून करा. 

*  *  *

                  गेली ६० वर्षे मी गृहस्थाश्रमी संन्यासिनीचे जीवन जगत आहे. काही वर्षांपूर्वी वाचन केलेल्या नाडीग्रंथात याचा उल्लेख आढळला. ' त्या गृहस्थाश्रमी संन्यासी आहेत.' असे त्यामध्ये म्हटले आहे. त्यात पुढे असेही म्हटले आहे, की वयाच्या ६३ व्या वर्षी त्या गृहस्थाश्रमाचा त्याग करून आश्रमात संन्यस्त जीवन जगतील. त्यांना ब्रम्हज्ञान प्राप्त होईल. त्या श्री सत्य साई बाबांची भक्ती करत असतील आणि सत्य साई बाबांशी संयुक्त असतील. त्या साई स्वरूपच आहेत. ही  सर्व भाकिते आज खरी ठरली आहेत. 
                   भगवान बाबांना तक्रारवजा सुरात मी अनेकदा म्हणत असे, की त्यांनी मला केवळ भगवद्प्रीत्यर्थ जीवन देण्याऐवजी कौटुंबिक जीवनात का गुंतवले ? त्यावर भगवान म्हणत, ' राधा विवाहितच होती.' आता मला त्याचे कारण समजले. आंडाळचे एक गीत असे आहे, " माझे जीवन परमेश्वरासाठी आहे, मानवासाठी नाही." मी जर आंडाळसारखी परमेश्वरासाठी जगले असते तर माझे जीवन आंडाळप्रमाणेच झाले असते. परंतु मी वेगळी आहे. मी जगाला दाखवून दिले, की संसारात राहूनही एखादी व्यक्ती अखंड परमेश्वराच्या अनुसंधानात राहू शकते. केवळ ह्यासाठी स्वामींनी मला कौटुंबिक जीवनात गुंतवले. गृहस्थाश्रमी व्यक्ती क्षण न् क्षण परमेश्वरासोबत कशी राहू शकते हे माझ्या जीवनातून दर्शविले जाते. 

जय साई राम

ॐ श्री साई वसंतसाईसाय नमः 

सुविचार 

           " आत्म्याचा परमेश्वराशी पूर्णत्वाने योग झाल्यानंतर सत्याचे पूर्णांशाने प्रकटीकरण होते. " 

प्रकरण तिसरे 

मूळ पुढे सुरु 

                   परमेश्वर चरणी अर्पण केलेल्या फलाशाविरहित कर्मांमधून प्रचंड ऊर्जेची निर्मिती होते. कर्मांचा कर्मयोग होतो. कौटुंबिक जबाबदाऱ्या, भक्तांचे आदरातिथ्य, तपस्या करून मला कधीही थकल्यासारखे वाटत नसे. त्याचे हेच रहस्य आहे. कोणतेही कर्म करताना जर भगवन्नामातील जादुई शक्तीला आवाहन केले, तर अजिबात कंटाळा वा थकवा जाणवत नाही. 
                   ह्या तत्वावर आधारीत मुक्ती निलयममधील आश्रमवासी ' तोडजोड ' नावाचा एक खेळ खेळतात. त्याची थोडक्यात माहिती खाली देत आहे. 
                  कागदाच्या चिठ्ठ्यांवर काही शब्द लिहून एका बॉक्समध्ये चिठ्ठ्या ठेवल्या जातात. खेळ खेळणाऱ्याने त्यातील चिठ्ठ्या उचलायच्या आणि त्यामध्ये जे शब्द लिहिले असतील ते शब्द परमेश्वराशी जोडायचे. किंवा त्याच्या मूळ अर्थाच्या जोडीने आध्यात्मिक अर्थ लावायचा. आम्ही सर्वजण हा खेळ खेळतो आणि दिव्यानंदाची अनुभूती घेतो. उदा. मी एक चिठ्ठी उचलली त्यावर पॉरिज ( porridge ) हा शब्द लिहिला होता. त्यावर मी pour prema age after age ( युगानुयुगे प्रेमाचा वर्षाव करा ) हा आध्यात्मिक अर्थ सांगितला. हे ऐकताक्षणी सर्वांनी आनंद व्यक्त केला. जेव्हा तुम्ही प्रत्येक गोष्ट परमेश्वराशी जोडता तेव्हा हे असेच घडते. तुम्हाला दिव्यानंदाचा लाभ होतो. हा आनंद का बरं मिळतो ? कारण त्या वस्तूमध्ये असलेल्या परमेश्वराशी तुम्ही स्वतःला जोडता. 

उर्वरित प्रकरण पुढील भागात ..... 

जय साई राम  

ॐ श्री साई वसंतसाईसाय नमः 

सुविचार 

" सत्य हे सत्यस्वरूपात अस्तित्वात असते."

प्रकरण तिसरे 

मूळ पुढे सुरु 

                    कानावर पडणारा प्रत्येक शब्द तात्काळ परमेश्वराशी जोडण्याचा प्रयत्न करा. उदा. तुम्ही मोर शब्द ऐकलात तर तुम्हाला मुकुटांवर मोरपीस धारण करणाऱ्या श्रीकृष्णाचे स्मरण व्हायला हवे. कोकीळ शब्द ऐकलात तर तुम्हाला कृष्णाच्या मुरलीचे मधुर स्वर आठवले पाहिजेत. 
                  जर एखाद्याने तुम्हाला विचारले, " तुम्ही कधी आलात ?" तर त्यावर मी कधी आलो ? माझे मूळ स्थान कोणते आहे ? परमेश्वराचे वास्तव्य असलेल्या माझ्या मूळस्थानाशी मी परत कसा जाऊ ? तुमच्या मनामध्ये अशी विचारप्रक्रिया सुरु व्हायला हवी. सुरुवातीला जरा हे कठीण वाटेल, परंतु सरावाने ते अंगवळणी पडेल आणि पडायलाच  हवे. 
                   प्रवास करताना तुम्ही रस्त्यावरच्या पाट्या वाचत असाल, उदा. तुम्ही ' शंकर शक्ती सिमेंट ' अशी पाटी पाहिलीत तर तुम्ही मनात भगवान शंकर आणि पार्वती देवी यांच्याविषयी विचार केला पाहिजे. जर तुम्ही मथुरा शब्द वाचलात तर कृष्णाविषयी विचार करा. जर वसंत आणि कंपनी अशी पाटी वाचलीत तर वसंतसाई मंत्राचा विचार करा. 
                 अशातऱ्हेने मी माझ्या दिनचर्येमध्ये आणि नित्य कर्मांमध्ये गर्भितार्थ शोधत असते. तुम्हीही तुमची सर्व नित्यकर्मे परमेश्वराशी जोडून प्रेमभावे करा आणि कर्मफलाची अपेक्षा न ठेवता त्यालाच अर्पण करा. या कार्यप्रणालीतून अन्नामध्ये, घरामध्ये, गावामध्ये तसेच देशामध्ये आणि संपूर्ण विश्वामध्ये प्रेमस्पंदने पसरतात. 

उर्वरित मजकूर पुढील भागात ..... 

जय साईराम

         

ॐ श्री साई वसंतसाईसाय नमः 

सुविचार 

" परमेश्वर हाच एकमात्र गुरु आहे."

प्रकरण तिसरे 

मूळ पुढे सुरु 

* संध्याकाळी व्हरांड्यामध्ये बसून धार्मिक ग्रंथाचे, पुराणातील कथांचे वाचन करत असे. झोपायला जाण्यापूर्वी वेदिकेवर स्वामींचे दृश्यरुपी आशीर्वाद ( उदा. विभूती, चंदन अमृत इ. ) मिळाले आहेत का ते नीट निरखून पाहत असे. 

ॐ 

                    थोडक्यात सांगायचे तर २४ तास परमेश्वराचे पूजन चिंतन हेच खरे माझ्या जीवनाचे सूत्र. या ' मी विना मी ' ला साईस्वरूप प्राप्त करून देणाऱ्या गेल्या ३५ वर्षांच्या माझ्या तपाची व साधनेची ही छोटीशी झलक आहे. 
तोड - जोड 
                   लहानपणापासूनच मला एक सवय आहे. मी जे जे काही पाहते ते मी परमेश्वराशी जोडते. गृहस्थधर्म पाळत असताना मी या सवयीचा उपयोग करून घेतला. घरातील सर्व कर्तव्ये आणि कौटुंबिक जबाबदाऱ्या मी परमेश्वराशी जोडल्या. उदा. दरवाजा पाहिला की माझ्या मनात येत असे, की हा काही साधारण दरवाजा नाही हा स्वर्गाचा दरवाजा आहे. खिडकी पाहिली की विचार करत असे की ही माझ्या हृदयाची खिडकी आहे, ज्यामधून मी परमेश्वराचे दर्शन घेऊ शकते. झोपाळा मला राधाकृष्णाची आठवण करून देत असे व मी अशी कल्पना करत असे, की ते माझ्या हृदयात झोके घेत आहेत. अशातऱ्हेने आपण पहात असलेले सर्व काही परमेश्वराशी जोडू शकतो. 

उर्वरित मजकूर पुढील भागात ..... 

जय साईराम