ॐ श्री साई वसंतसाईसाय नमः 

सुविचार 

            " जेव्हा रूप आणि भाव यांच्यामध्ये समन्वय असतो तेव्हाच आपण सत्याची अनुभूती घेतली असे म्हणू शकतो."

प्रकरण सहा 

मंत्र 

                 नंतर ध्यानामध्ये स्वामींनी सांगितले की सर्वजण या मंत्राचे उच्चारण करू शकतात. व्याधीग्रस्त लोकांना हा मंत्र सहाय्यभूत ठरेल. मी विभूतीवर तो मंत्र लिहून ती विभूती अनेक व्याधीग्रस्त व्यक्तींना पाठवली. तेव्हापासून आतापर्यंत मंत्र, प्रार्थना आणि विभूती यांच्या सहाय्याने अनेक समस्यांचे निराकरण झाले आहे. स्वामी म्हणाले, " आध्यात्मिक मार्गावर प्रगती करणाऱ्यास व शांतीची अनुभूती घेण्यास हा मंत्र सहाय्यभूत होतो. हा मुक्तीमंत्र आहे. देह, मन आणि आत्मा ह्यांच्या त्रिविध तापांवर रामबाण उपाय असा हा मंत्र आहे. 
३० डिसेंबर २००३ ध्यान 
वसंता : स्वामी, ॐ श्री साई वसंतसाईसाय नमः हा मंत्र कसा काय आला ?
स्वामी : तुझ्या प्रेमामुळेच तुझे नाव परमेश्वराशी जोडले गेले. तुझ्या अनिर्बंध प्रेमवर्षावाने परमेश्वराचे नाव तुझ्याशी जोडले गेले. 
वसंता : स्वामी, या मंत्राचे उच्चारण करणाऱ्यास कोणता लाभ होईल ?
स्वामी : अनेक रोग या मंत्राने बरे झाले आहेत, हे कसं घडलं ? वृंदावनामध्ये सर्वजण राधे राधे या नामाचा जप करत असल्यामुळे सर्वजण तिच्यासारखेच बनतात. त्याचप्रमाणे वसंतसाई मंत्राचा जप करणारे तुझ्यासारखेच प्रेमस्वरूप होतील. 
ध्यान समाप्ती 

उर्वरित प्रकरण पुढील भागात .....

जय साईराम

ॐ श्री साई वसंतसाईसाय नमः 

सुविचार 

          " हे जग म्हणजे आपल्या भाव आणि विचारांचा आविष्कार होय. हा एक आरसा आहे. "

प्रकरण सहा 

मंत्र

              संध्याकाळी डॉक्टरांच्या कुटुंबाने मला त्यांच्या देवघरात बोलावले आणि त्यांनी मला नवीन साडी दिली. ते म्हणाले " तुम्ही आमची पूजा स्वीकारली पाहिजे." त्यांनी मला एका सुशोभित खुर्चीत बसण्यास सांगितले. मी त्याला नकार दिला आणि म्हणाले," नाही नाही मी नाही बसणार." डॉक्टर व इतरांनी माझी आर्जवं केली. स्वामींनी साडीवर SV अशी अक्षरे लिहून साडीला आशीर्वाद दिले. मी ती साडी नेसून देवघरात बसले. तेव्हा रात्रीचे दहा वाजले होते. डॉक्टरांचे कुटुंब माझ्या भोवती बसले आणि आम्ही सर्वांनी १०८ वेळा  ॐ श्री साई वसंतसाईसाय नमः या मंत्राचा जप केला. 

उर्वरित प्रकरण पुढील भागात ..... 

जय साईराम  

ॐ श्री साई वसंतसाईसाय नमः 

सुविचार 

          " आपली श्रध्दा आणि भक्ती यांच्याद्वारे आपण लाभान्वित होतो, कोणतीही बाह्य गोष्ट वा व्यक्ती यांच्यामुळे नव्हे. " 

प्रकरण सहा 

मंत्र 

              " हा मंत्र म्हणजे स्वामींच्या आणि माझ्यामध्ये असलेल्या बंधांच्या सत्यतेचा ठोस पुरावा आहे. मी त्यांची चितशक्ती असल्याचे हा मंत्र दर्शवतो. माझा जन्म त्यांच्यापासून झाला आहे आणि माझा त्यांच्याशी योग होणार आहे. "
               लंडनच्या एक भक्त निर्मला, माझे पहिले पुस्तक वाचून वडक्कमपट्टीला आल्या. लंडनला परतल्यानंतर त्यांनी मला पत्र पाठवले. त्यामध्ये त्यांनी त्यांच्या नोकरीच्या ठिकाणी येणाऱ्या समस्यांविषयी लिहिले होते. मी प्रार्थना केल्यास त्यांना सहाय्य होईल, यावर त्यांचा पूर्ण विश्वास होता. बऱ्याचदा त्या मला स्वामींकडे त्यांच्यासाठी प्रार्थना करण्यास सांगत. या दरम्यान मी परमकुडीतील डॉक्टरांच्या घरी जा ये करत असे, जिथे चिठ्ठीवर स्वामींचे संदेश येत. २३ मे १९९८ रोजी मी परमकुडीमध्ये असताना निर्मलाने  फोन केला व म्हणाल्या, " अम्मा, प्लीज मला एक मंत्र सांगा ना. दिवसेंदिवस येथील परिस्थिती कठीण होत चालली आहे." मी म्हणाले," मला माहित नाही. मी स्वामींना विचारेन." मी दुपारच्या ध्यानात स्वामींकडे प्रार्थना केली. ध्यानानंतर आम्ही पाहिलं की एका कागदाच्या तुकड्यावर ॐ श्री साई वसंतसाईसाय नमः हा मंत्र स्वामींनी लिहिला होता. 
                मला धक्काच बसला आणि खूप भीतीही वाटली. मी आक्रोश करू लागले. " स्वामींनी माझे नाव का बरे घातले ?"

उर्वरित प्रकरण पुढील भागात ..... 

जय साईराम

            

ॐ श्री साई वसंतसाईसाय नमः

सुविचार

           " बाह्य जगत, कीर्ती, संपत्ती, कोणी व्यक्ती वा कोणतीही गोष्ट यापैकी कशाचीही इच्छा न धरता फक्त परमेश्वराची इच्छा धरा." 

प्रकरण पाच

 

चंद्र आणि मन

                 त्यावेळी स्वामींनी मदुराईहून एका मुलाला पाठवले. त्यांच्या घरी अनेक चमत्कार घडतात. तिथे स्वामी या मुलाशी बोलतात. तो मुलगा मला म्हणाला, " स्वामींनी मला तुमच्या घरी येण्यास सांगितले. " स्वामी त्या मुलाच्याद्वारे माझ्याशी बोलले व माझे सांत्वन केले. नंतर तो मला मदुराईला त्याच्या घरी घेऊन गेला. तेथे ' इथेच, याक्षणी, मुक्ती भाग २ ' हस्तलिखिताच्या प्रत्येक पानावर विभूती साक्षात करून स्वामींनी आशीर्वाद दिले. आम्ही दुसरे पुस्तक छापल्यानंतर स्वामींनी १०८ नामे दिली आणि यातील प्रत्येक नाव गीतेतील अध्यायाशी जोडून त्यावर लिहिण्यास सांगितले. प्रथम मी काही नामे लिहिली. नंतर मी असे लिहिले की ही सहा नामे, जो कोणी या अध्यायाचे आचरण करेल त्याच्यासाठी आहेत. स्वामींनी स्वतः मला १०८ नावे देऊन सांगितले की मी त्यांची शक्ती आहे. तथापि मी असे लिहिले की, जो ह्या अध्यायाचे आचरण करेल तोही त्या नामांसाठी पात्र असेल. केवळ ' साई पादधुलीकायै ' हे नाम माझ्यासाठी आहे. 
               मला स्वामींच्याद्वारेही नावलौकिक नको आहे. मी नेहमीच एकटी असते. मला कोणाकडूनही प्रशंसेची इच्छा नाही वा आवश्यकता नाही. मला प्रशंसेचीही भीती वाटते. मी परमेश्वराकडे एक वर मागितला, की संपूर्ण विश्वामध्ये आध्यात्मिक जाणीव निर्माण होऊन मुक्ती मिळावी. एवढीच माझी विनवणी होती. हा माझा स्वभाव आहे. त्यासाठीच मी अश्रू ढाळत आहे. मी माझ्या कुटुंबासाठी किंवा कोणत्याही भौतिक गोष्टीसाठी अश्रू ढाळत नाही. मी केवळ परमेश्वरासाठी आणि वैश्विक मुक्तीसाठी अश्रू ढाळत आहे. 

उर्वरित प्रकरण पुढील भागात ..... 

जय साईराम

ॐ  श्री साई वसंतसाईसाय नमः 

सुविचार

            " आपण साधुसंत आणि महात्मे यांच्या आदर्श जीवनाचे अनुसरण केले पाहिजे व केवळ सत्य म्हणजेच आपल्यातील आत्मतत्व याच्यावर अवलंबून राहिले पाहिजे. "

प्रकरण पाच 

चंद्र आणि मन 

                माझे ' इथेच याक्षणी मुक्ती भाग २ ' हे पुस्तक प्रकाशित करण्यापूर्वी कोणी म्हणाले, की माझे नाडीग्रंथ वाचून घ्यावे. आम्ही अनेक नाडीग्रंथ पाहिले. सगळ्या नाडीग्रंथांमध्ये असे लिहिले आहे की मी पूर्वजन्मी राधा होते व आता माझे शरीर ज्योतीस्वरूप बनून भगवंताच्या देहामध्ये विलिन होईल. आम्ही नाडीवाचनाचा पुस्तकात समावेश केला आणि हस्तलिखित पुट्टपर्तीला स्वामींच्या आशीर्वादासाठी नेले. 
               त्यावेळी स्वामींच्या एका सद्भक्तांनी आम्हाला सुचवले की आम्ही हे नाडीवाचन पुट्टपर्तीतील स्वामींच्या एका जवळच्या भक्ताला दाखवावे. ते कदाचित आम्हाला पुस्तकावर स्वामींची स्वाक्षरी मिळवून देण्यास मदत करतील. तथापि त्या भक्ताने नाडीवाचन करून ते तत्परतेने प्रशांती निलयमच्या कार्यालयातील उचचपदस्थ अधिकाऱ्यास दिले. दुसऱ्या दिवशी त्या अधिकाऱ्याने आम्हाला त्यांच्या कार्यालयात बोलावले. माझे पहिले पुस्तक दाखवून त्यांनी मला पुट्टपर्तीतून बाहेर जाण्यास सांगितले व पुन्हा प्रशांती निलयममध्ये येऊ नये असे बजावले. 
               असे का बरं घडले ? माझे नाडीभाकीत वाचल्यावर त्यांना असे वाटले का, की मी स्वामींसारखी आहे किंवा मी स्वामींच्याच योग्यतेची आहे ? या भीतीपोटी त्यांनी मला पुट्टपर्ती सोडून जाण्यास सांगितले व प्रशांती निलयममध्ये येण्यास बंदी घातली. घरी परतल्यावर मी खूप रडले. सर्व पुस्तके एका बाजूला फेकून दिली. 

उर्वरित प्रकरण पुढील भागात ..... 

जय साईराम 

 

ॐ श्री साई वसंतसाईसाय नमः 

सुविचार 

         " कूपण मनुष्य जसा खर्च करण्यापूर्वी पै न पै मोजतो तसेच एकही सेकंड वाया न घालवता परमेश्वराचे चिंतन करा. इतर कोणत्याही गोष्टीवर वेळ खर्ची घालण्याचे कटाक्षाने टाळा. म्हणजे कूपणतेचे योगात रूपांतर होईल. "

प्रकरण पाच 

चंद्र आणि मन 

               जगाच्या कर्मांसाठी मी १० वर्षे रडत होते. असे कोणी रडेल का ? त्यापुढे मला माझे कुटुंब, मुलेबाळे त्यांचाही विसर पडला. मी दिवसरात्र जगासाठी अश्रू ढाळत होते. माझा चेहरा रडून रडून सुजला होता. मी स्वामींना वर मागितला, " स्वामी, कृपा करून सर्वांच्या  कर्माचा हिशोब चुकता करण्यासाठी मला मार्ग दाखवा. " 
              स्वामी म्हणाले, " रडू नकोस, तू तुझ्या अश्रुंनीच सर्व काही साध्य करणार आहेस. तुझी वैश्विक करुणाच संपूर्ण जगाला बदलेल. तू नक्कीच करशील. रडू नकोस. "
               जगातल्या सर्वांसाठी ढाळलेल्या अश्रुंचे हेच कारण आहे तर ! त्यावेळी जे माझ्या सोबत होते ते माझ्या भावनांचे साक्षीदार आहेत. प्रथम मी रडले की  सर्वजण माझे व्हायला हवेत. मग मी त्यांची कर्मे नष्ट  करण्यासाठी रडले. 
                लहान असतानाच मला व्याधी, जरा आणि मृत्यू यातून मुक्त व्हायचे होते. मला मार्ग सापडला. तो म्हणजे भगवंताशी लग्न करायचे आणि त्याच्याशी  सदेह एकरूप व्हायचे. आता मला सर्वांना त्यांच्या दुःखातून मुक्त करण्याचा मार्ग सापडला. 

***

उर्वरित प्रकरण पुढील भागात .....

जय साईराम   

ॐ श्री साई वसंतसाईसाय नमः 

सुविचार 

                 " काम ज्ञानाला झाकोळून टाकते.  भावनांचा उद्रेक इंद्रियांमध्ये प्रवेश करून नानाविध इच्छा दर्शवतो व अतृप्त अग्नीसारखा खऱ्या ज्ञानाला वेढून टाकतो आणि परिणाम स्वरूप सर्वनाश होतो." 

प्रकरण पाच 

चंद्र आणि मन 

                जगातल्या सर्वांसाठी काहीतरी करावं याचा मी ध्यासच घेतला. हा करुणामूर्ती परमेश्वर इथे अवतरला आहे. त्याचा सर्वांना फायदा नको का व्हायला ? त्यांच्यामध्ये परिवर्तन नको का व्हायला ? काही मार्ग आहे का ? त्या महान अवताराच्या चरणकमलांशी मी सर्वांना कसे बरे आणणार ? आता जर त्यांना दिलासा मिळाला नाही तर कधी मिळणार ? बुद्धाला मिळाले तसे मला उत्तर मिळेल का ? त्यांना अज्ञानाच्या अंधःकरातून बाहेर काढून जाणीवेच्या प्रकाशाकडे मी कसे बरे नेऊ ? 
                जगभरातून आलेली असंख्य पत्रे आणि फोन यामुळे माणूस कसा या सर्व रोगांना बळी पडतो आणि कर्मांचा प्रभाव कसा असतो याची मला जाणीव झाली. जागतिक कर्मतराजू समतोल करण्यासाठी मी मलाच अर्पण करायचे ठरवले. एका पारड्यात जगाची कर्मे होती. हा कर्मतराजू समतोल करण्यासाठी स्वतःला दुसऱ्या पारड्यात घातले. 

उर्वरित प्रकरण पुढील भागात ..... 

जय साईराम  

ॐ श्री साई वसंतसाईसाय नमः 

सुविचार

         " सत्याला केवळ वेद आणि उपनिषदे यांच्यामध्ये परिसीमित करू नका. सत्य सर्वव्यापी आहे व प्रत्येकाचे आहे. " 

प्रकरण 

चंद्र आणि मन 

               चतुर्युगाच्या अखेरीस प्रलय होतो आणि नंतर पुन्हा नवीन चक्र सुरु होते. हे कसं घडतं ? पुरुष प्रकृती म्हणजे काय ? स्वामी माझ्या जीवनाद्वारे हे दाखवत आहेत. परमेश्वर आणि निर्मिती एकच आहेत. यावेळेस प्रलय न घडवता आम्ही संपूर्ण जगाच्या कर्माचा संहार करून नवनिर्मिती करणार आहोत हे अवतारकार्य आहे.  मी विलाप करत होते आणि म्हणत होते, 
               " मी सर्व लोकांचा कर्मतराजू कसा बरं  समतोल करू ? मला सर्वांसाठी काहीतरी केलेच पाहिजे. यातून काय बरं मार्ग काढता येईल ? परमेश्वराने पृथ्वीवर अवतार घेतला असताना, संपूर्ण जगाला त्याचा लाभ व्हायला नको का ? नंतर त्यांना कोण पापमुक्त करणार ? त्यांचं काय होईल ? काहीतरी केलेच पाहिजे. मी करू तरी काय ?" 
               फक्त हाच प्रश्न सतत मला अंतर्मनात ऐकू येत होता. जणू काही किंचाळत होता. यावर कोणता मार्ग आहे ? या विचारांची तीव्रता इतकी होती की मला भीती वाटली, की मी आता पूर्णपणे कोसळणार. हे कार्य मी कसे पूर्णत्वास नेणार !

उर्वरित प्रकरण पुढील भागात 

जय साईराम

          

 

ॐ श्री साई वसंतसाईसाय नमः

सुविचार 

" भक्तांच्या प्रयत्नांनुसार परमेश्वर स्वतःला प्रकट करतो. "

प्रकरण पाच 

चंद्र आणि मन 

              काही दिवसांनी सावित्री पुट्टपार्टीला गेल्या. तेथील सुपर स्पेशालिटी हॉस्पिटलमध्ये यावर शिक्कामोर्तब झाले. काही दिवसांनी स्वामींनी त्यांना इंटरव्ह्यूला बोलावले, तेव्हा त्यांनी त्यांचे मेडिकल रिपोर्ट्स स्वामींनी दाखवले. स्वामी म्हणाले , " सगळं खरं आहे. वडक्कमपट्टीला जाऊन आण्टीनना भेटा." सावित्री त्यांचे पती व आई माझ्याकडे आले. स्वामी ध्यानात म्हणाले," तुझ्या प्रेमशक्तीने त्यांच्या कर्माचा संहार झाला आणि कॅन्सर कॅन्सल झाला. "
             सावित्री दक्षिण आफ्रिकेतील पाच साई सेंटर्सच्या चेअरपर्सन आहेत. 
            यानंतर जगभरातून मला अनेक पत्रे आणि फोन येऊ लागले. ते मला त्यांच्यासाठी प्रार्थना करायला सांगत. याविषयी मी ' प्रेम निवारण साई ' मध्ये लिहिले आहे. अनेकजण रोगमुक्त झाले. माझ्या प्रेमाने त्यांची कर्मे आणि रोग कसे नाहीसे होतात, हे स्वामींनी अनेक उदाहरणांद्वारे दाखवले. 

उर्वरित प्रकरण पुढील भागात ..... 

जय साईराम 

ॐ श्री साई वसंतसाईसाय नमः 

सुविचार 

          " भक्ती आणि प्रेम यांच्याद्वारे पसरणारी स्पंदने सिद्धीद्वारे प्रसूत होणाऱ्या स्पंदनांहून अधिक शक्तिशाली असतात."

प्रकरण पाच 

चंद्र आणि मन 

              माझ्या या भावनांमुळे कित्येक कुटुंबांमध्ये गैरसमज झाले. पालकांनी त्यांच्या मुलांना वडक्क्मपट्टीला येण्यापासून परावृत्त केले. त्यांना वाटले की त्यांची मुले कुटुंबियांपासून दुरावतील. काही स्त्रियांनी आपले पती संन्यासी होतील या भीतीने त्यांना माझ्यापासून दूर राहण्यास सांगितले. त्यावेळी अनेकांना असं वाटत होतं की जो कोणी माझ्या  सान्निध्यात येईल त्यांना मी संन्यासी करेन !
              मला स्वतःला माझे भाव आत्ताच समजत आहेत. मला जगातील सर्वांना माझी मुले करून माझ्या गर्भामध्ये धारण करायचे आहे आणि प्रत्येकाला शुकमुनी बनवायचे आहे. 

प्रेम इलाज 

              स्वामी एकदा म्हणाले," जेव्हा तू इतरांसाठी प्रार्थना करतेस तेव्हा तुझ्या मातृप्रेमामुळे त्यांना निश्चित लाभ होतो. ही तुझी प्रेमशक्ती आहे जी तू सर्वांना मुक्त हस्ताने देतेस. " 
              माझ्या प्रार्थना व प्रेमशक्ती यामुळे पुष्कळांचे दुर्धर आजार बरे झालेत. अनेक जण व्याधीमुक्त झालेत. दक्षिण आफ्रिकेच्या एक भक्त, सावित्री त्यांना कॅन्सर झाला होता. 
               त्या बऱ्या व्हाव्यात यासाठी मी स्वामींकडे रडले तेव्हा स्वामी म्हणाले, " कॅन्सर कॅन्सल्ड ". स्वामी काय म्हणाले ते मी त्यांना दुसऱ्या दिवशी सांगितले. त्या लगेचच डॉक्टरांकडे तपासणीसाठी गेल्या. तपासणी केल्यावर असे आढळून आले की त्यांच्या शरीरात कॅन्सरचा मागमूसही नव्हता.

उर्वरित प्रकरण पुढील भागात ..... 

जय साईराम 

          

ॐ श्री साई वसंतसाईसाय नमः 

सुविचार 

" आपणच आपली दुःख, भोग वा मुक्ती यास कारणीभूत असतो. " 

प्रकरण पाच 

चंद्र आणि मन 

             स्वामींच्या विचारात मला घरदार, मुलेबाळे, कुटुंब कशाचीही आठवणही नसे. स्वामींशिवाय मी दुसऱ्या कुणाचाही विचार केला नाही. तरीसुद्धा माझे प्रेम सर्व गोष्टींवर आणि सर्वांवर वर्षू लागले. हे प्रेमवर्तुळ इतके वाढत गेले की त्यामध्ये संपूर्ण विश्व सामावले. हे प्रेम सर्व छिन्नविछिन्न करून, सगळ्याची उलथापालथ करून, सर्वव्याप्त झाल्यानंतरच शांत होईल. 
             स्वामींसाठी माझा विलाप म्हणजेच प्रेमभाव. हा प्रेमभाव आता इतरांसाठी विलाप करत आहे. हे प्रेमभावाचे मातृभावात झालेले विस्तृतीकरण आहे, मातेची ममता. " जगातील सर्वजण माझी लेकरे आहेत, माझीच आहेत." 
              रात्रंदिवस मी जगातील सर्व लोकांसाठी रडते. कोणालाही पाहिले की ते मला आपले वाटतात. या जगात कोण बरे असे रडते ? वाचकांनो तुम्ही प्रत्येकावर एवढे भरभरून प्रेम करता का ? जो दिसतो तो आपला आहे असा तुम्ही विचार करता का ? त्यांच्यासाठी तुम्ही अश्रू ढाळता का ? तुम्ही जर असे करत असाल तर तुम्ही प्रकृतीची, पर्यायाने माझी मनोवस्था समजू शकाल.

उर्वरित प्रकरण पुढील भागात ..... 

जय साईराम

ॐ श्री साई वसंतसाईसाय नमः 

स्वामींचा प्रेम संदेश 

प्रेमाला ना जन्म आहे ना मृत्यू !
आज मनुष्य निरर्थक इच्छांच्या मागे धावतो आहे आणि अत्यंत स्वार्थी बनल्यामुळे तो केवळ स्वतःच्या कल्याणासाठी प्रार्थना करतो. समाजासाठी नाही. समाज कल्याण, राष्ट्र कल्याण हे  दोन्ही अत्यंत महत्वाचे आहे. समाज कल्याण हा आपल्या वर्तणुकीचा भाग असायला पाहिजे. समाजाविना व्यक्तिची प्रगती होऊ शकत नाही. व्यक्ती म्हणजे कोण ? व्यक्तिच्या अंतर्यामी असणारी शक्ती म्हणजेच प्रेमशक्ती होय. ह्या प्रेमशक्तीमुळेच विश्वात ऐक्य नांदते. 

 आज हजारो लोकं येथे जमण्याचे कारण काय ? केवळ प्रेमामुळे तुम्ही येथे आलात. हे प्रेम नसते तर तुम्ही येथे आला नसतात. हे प्रेम कसे आहे ? हे परस्परपूरक आहे. तुम्ही द्या आणि घ्या. तुम्ही परमेश्वराचे प्रेम संपादित करा व परमेश्वराला तुमचे प्रेम अर्पण करा. तथापि दोन्ही एकच आहे, सारखे आहे. मानवी प्रेम हे दिव्य प्रेमाचे प्रतिबिंब आहे, परंतु ह्या दिव्य प्रेमाची देणगी गैरवापर करण्यासाठी दिलेली नाही. तुम्ही त्याचा जास्तीत जास्त चांगला वापर केला पाहिजे. तुमचे हृदय विशुद्ध प्रेमाने  भरून टाका व प्रेमात इतरांनाही सहभागी करा. तुमचे राष्ट्र सुखी आणि आनंदी बनवा. हा प्रेमाचा खरा स्वभाव आहे. हे दिव्य प्रेम तुमच्या मध्ये विकसित करा व तुमचा जन्म सार्थकी लावा. तुमच्या हृदयामध्ये परिवर्तन घडवा म्हणजे ते प्रेमाने काठोकाठ भरून जाईल व तेथे द्वेष, मत्सर, तिरस्कार व दुःख यांना जागाच  राहणार नाही. आज मानवता द्वेषभावनेने बाधित आहे. एक व्यक्ती दुसऱ्या व्यक्तीचा, एक गाव दुसऱ्या गावाचा एक राष्ट्र दुसऱ्या राष्ट्राचा द्वेष करते. अशा तऱ्हेने फार मोठ्या प्रमाणात द्वेषभावना सर्वत्र पसरली आहे म्हणून प्रथम तुम्ही द्वेष, तिरस्कार व क्रोध यापासून मुक्त व्हा. हे केवळ प्रेमाद्वारे शक्य आहे. त्यासाठी प्रेम विकसित करा. तुम्ही सर्वांशी प्रेमाने व सस्मित चेहऱ्याने संवाद साधला पाहिजे. एवढेच नाही शत्रूचेही प्रेमाने स्वागत करा. तुमच्या या कृतीने तुम्ही त्याच्या हृदयात परिवर्तन घडवाल. आता ह्या क्षणापासून तुम्ही प्रेमभाव विकसित करा. द्वेषभाव हृदयातून हद्दपार करा. क्रोधाला तुमच्या जवळपासही फिरकू देऊ नका. क्रोधाला दूर ठेवल्यास तुम्ही आनंदी व्हाल. हा आजच्या दिवसाचा खरा संदेश आहे. आज मी येत असताना एका परदेशी व्यक्तीने मला ' Happy Birthday ' म्हटले. त्यावर मी म्हणालो की मी सदैव आनंदी ( Happy ) असतो. तुम्ही सदैव आनंदी नसल्यामुळे मी तुम्हाला आनंदी राहण्यासाठी आशीर्वाद देतो. तुम्ही मला ' Happy Birthday ' म्हणण्याची आवश्यकता नाही कारण मी प्रत्येक क्षणी आनंदात असतो. 

तुम्ही सर्वांनी तुमच्या जीवनाचा प्रत्येक क्षण आनंदात घालवावा. तुमचे जीवन आरोग्यपूर्ण असावे; प्रेमाची ही अनमोल देणगी समस्त विश्वासमवेत वाटून घेऊन तुम्ही तुमचे जीवन सार्थकी लावावेत हीच माझी इच्छा आहे. 

- बाबा 

संदर्भ - स्वामींचा, जन्मदिना निमित्त दिलेल्या संदेशातून. 

 जय साईराम

ॐ श्री साई वसंतसाईसाय नमः 

सुविचार 

" आपल्या अंतर्यामी सर्वकाही सामावलेले आहे." 

प्रकरण पाच 

चंद्र आणि मन 

                     मी हजारो लोकांना प्रेमशक्ती दिली. तसेच नद्या, समुद्र यांनाही प्रेमशक्ती दिली. माझ्याकडे कोणीही एखादा भक्त आला तर मी तात्काळ स्वामींकडे रडून म्हणत असे, " मला तो हवा, मला ती हवी." हे ऐकून सर्व चकित होत, त्यांना वाटे की मी खरोखरच वेडी झाले आहे. मला स्वतःलाही आश्चर्य वाटे. " मी अशी का आहे ?"

उर्वरित प्रकरण पुढील भागात ..... 

जय साईराम  

ॐ श्री साई वसंतसाईसाय नमः 

सुविचार 

       " ' मी ' हे अहंकाराचे प्रतीक आहे. स्वप्रयत्नांद्वारे  साधक अंतरातील ' मी ' ला प्राप्त करून घेतो हाच आत्मसाक्षात्कार होय. "  

प्रकरण पाच 

चंद्र आणि मन 

             स्वामींनी मला हे बऱ्याच वेळा सांगितले. ते ऐकल्यावर मी भयभीत होऊन अखंड रडत होते. मी भित्र्या स्वभावाची आहे. आता हे सांगतानाही मला अशी भीती वाटते, की लोकांना वाटेल मी वेडी आहे ; तथापि स्वामींनी मला हे लिहिण्यास भाग पाडले आहे. १९९९ मध्ये मला हे सांगितल्यावर स्वामी म्हणाले, " जगामध्ये अनेक मोठ्या दुर्घटना घडतील. " त्यांनी भाकित केल्यानुसार मोठ्या दुर्घटना घडल्या आणि अजूनही घडत आहेत. 
             या दरम्यान माझे प्रेम दुथडी भरून वाहत होते. मी त्यावर नियंत्रणही ठेवू शकत नव्हते. मी अखंड अश्रू ढाळत होते. स्वामींनी त्यावर एक उपाय शोधून काढला ते म्हणाले," तुझ्या प्रेमाचा १/१००० व भाग तू प्रत्येकाला दे. त्याने तुला थोडे बरे वाटेल.

उर्वरित प्रकरण पुढील भागात

जय साईराम

ॐ श्री साई वसंतसाईसाय नमः 

सुविचार 

" भाव रूप धारण करतात. "  

 

 प्रकरण पाच 

चंद्र आणि मन 

                   उच्च अध्यात्मिक तत्वे गोष्टीरूपात मांडली तर मनावर ठसतात . स्वामी आणि मी नाट्यरूपात पुरुष प्रकृती कथा सादर करत आहोत. पुरुष प्रकृती तत्व हाच निर्मितीचा मूळ पाय आहे. लोकांच्या मनात भगवद् भाव  जागृत करण्यासाठी आणि त्यांना उन्नतीची जाणीव होण्यास मदत करण्यासाठी आम्ही जन्म घेतला आहे माझे जीवन प्रकृतीतत्वाचे उदाहरण आहे. 
दुथडी भरून वाहणारे प्रेम.... 
१३ सप्टेंबर १९९९
                 माझ्या पोटात काहीतरी जड असल्यासारखे मला जाणवले. मी ध्यानामध्ये स्वामींना विचारले ते म्हणाले, 
                 " तू प्रकृती आहेस तुझ्या पोटामध्ये  ॐ कार आणि पंचमहाभूते आहेत. तुझ्यामधूनच सर्व गोष्टींची उत्पत्ती होईल . आता अस्तित्वात असलेल्या या मूळ विश्वाप्रमाणेच तू ॐ कार आणि पंचतत्वांसहित नवीन विश्वाची निर्मिती करशील. " 

उर्वरित प्रकरण पुढील भागात ..... 

जय साईराम

ॐ श्री साई वसंतसाईसाय नमः 

सुविचार 

               " साधनामार्गावरून वाटचाल करत साधक पुढे जातो. त्याला वैश्विक ' मी ' चे दर्शन होते. ह्यालाच परमेश्वराचा साक्षात्कार म्हणतात. " 

प्रकरण पाच 

चंद्र आणि मन 

                 ' स्त्री, पुरुष म्हणजे देहभावाशी संबंधित ' याच दृष्टिकोनातून ते पाहतात. हा दृष्टिदोष आहे. याकडे केवळ आत्मा आणि परमात्मा ह्यांच्यामधील बंध याच दृष्टिकोनातून पाहिले गेले पाहिजे. 
                  ' इथेच या क्षणी मुक्ती ' पूर्ण केल्यावर स्वामींनी मला त्याचा दुसरा भाग लिहिण्यास सांगितले. हे पुस्तक पुरुष प्रकृती तत्व आणि कर्मकायदा कसे कार्य करतो हे दर्शविते. पाप आणि पुण्य ही हातकड्यांची जोडी कशी आहे याबद्दलही मी लिहिले आहे. 
                   महान काव्यांद्वारे नीतिमत्ता शिकवली जाते. मानवाच्या हृदयातील सद्गुण आणि दुर्गुण ह्यामधील संघर्ष रामायण व महाभारत यासारख्या काव्यग्रंथांमधून व्यक्त केला आहे. नीतीतत्वे गोष्टीरूपात सांगितली की ती साहजिकच वाचकांना आकर्षित करतात. तीच नीतीतत्वे सिनेमा आणि नाटकाच्या माध्यमातून दाखवली गेली तर त्याचे मनावर खोलवर ठसे उमटतात आणि ती मूल्ये अंतर्यामी रुजतात. तथापि पुरुष प्रकृती तत्व स्पष्ट करणारे कोणतेही उदाहरण नाही. राम - पुरुष - परमात्मा सीता म्हणजे प्रकृती, कृष्ण - परमात्मा आणि राधा म्हणजे प्रकृती. पवित्र ग्रंथामध्ये फक्त इतकेच सांगितले गेले आहे. या तत्वाचे विशेष स्पष्टीकरण केलेले नाही. 

उर्वरित प्रकरण पुढील भागात ..... 

जय साईराम 

ॐ श्री साई वसंतसाईसाय नमः 

सुविचार 

          " वैराग्याची तलवार आणि बुद्धीचे सामर्थ्य यांच्या सहाय्याने कामनामक शत्रूंचा नायनाट करा. " 

प्रकरण पाच  

चंद्र आणि मन 

                  मी हे स्पष्टपणे लिहिले आहे आणि स्वामींनीही हे अतिशय स्पष्टपणे सांगितले आहे; तरीही प्रशांती निलयममधील काही जणांना ह्या शुद्ध प्रेमभक्तीबद्दल शंका आहे. ते याला ऐहिक प्रेम समजतात. या प्रेमाने भगवंताचा महिमा कसा बरं कमी होईल ? 

उर्वरित प्रकरण पुढील भागात ..... 

जय साईराम   

ॐ  श्री साई वसंतसाईसाय नमः 

 सुविचार 

             " शिकून वा पुस्तके वाचून अंतःकरणामध्ये परमेश्वराप्रती प्रेमभाव येत नाही तर एखाद्या महापुराप्रमाणे अंतःकरणातून आवेगाने उसळावा लागतो. " 

प्रकरण पाच 

चंद्र आणि मन 

                 "  राधा हे एका स्त्रीचे नाव आहे किंवा तिचे प्रेम हे सामान्य मानवी प्रेम आहे असा विचार करणे चुकीचे आहे. परमेश्वर स्त्री पुरुष असा भेदभाव करत नाही. जर एखाद्या व्यक्तीमध्ये राधेचा शरणागत भाव असेल तर ती स्त्री असो वा पुरुष, राधेचा अंश समजली जाईल. ज्यांच्यामध्ये हा अंश असेल ते परमेश्वराशिवाय दुसऱ्या कशाचाच विचार करू शकणार नाहीत. ते दुसरा कसलाही विचार करणार नाहीत. राधा ज्ञानी आहे, ती या जगात वावरली पण तिने जगाला स्वतःमध्ये राहू दिले नाही. हा अनुभव घेण्यासाठी राधेच्या भक्तीची जाण असायला हवी. " 

उर्वरित प्रकरण पुढील भागात ..... 

जय साईराम

ॐ  श्री साई वसंतसाईसाय नमः 

सुविचार 

           "शुद्ध सत्वाचे तेज प्रकट झाल्यानंतर देह दिव्य तेजाने झळकतो ."

प्रकरण पाच 

चंद्र आणि मन

                 मी म्हटल्याप्रमाणे  माझी सर्व पुस्तके ही माझ्या पहिल्या पुस्तकाचे विस्तृतीकरण आहे .  पहिल्या पुस्तकात स्वामी म्हणतात , "तुझ्या प्रेमाचे ऋण फेडण्यासाठी मी दुसरा अवतार घेईन ." त्यावेळी मी त्यावर विशेष विचार केला नाही . त्यामुळे त्यावेळी मला स्वामींच्या शब्दातील  गर्भितार्थ समजला नव्हता . आता मला समजले की  स्वामींचे ते वाक्य प्रेमसाई अवताराशी निगडित होते . 'प्रेमसाई अवतार ' संबंधित पुस्तके म्हणजे स्वामींच्या या एका वाक्याचे विस्तृत रूप आहे . समर शॉवर्सच्या २३९ च्या पानावर स्वामी म्हणतात,

उर्वरित प्रकरण पुढील भागात

जय साईराम       

ॐ श्री साई वसंतसाईसाय नमः 

सुविचार 

         " साधनेद्वारे सर्वजण परमेश्वराला जाणू शकतात व परमेश्वर होऊ शकतात. " 

प्रकरण पाच 

चंद्र आणि मन

                स्वामींनी स्वतः माझ्या पहिल्या पुस्तकावर स्वाक्षरी केली. या पुस्तकात स्वामी म्हणतात की मी राधा आहे, प्रकृती आहे, त्यांची शक्ती आहे. माझी सर्व पुस्तके म्हणजे दुसरे काही  नसून याच तीन अवस्थांचे विस्तृतीकरण आहे. स्वामींनी माझ्या पहिल्या पुस्तकावर स्वाक्षरी करून हेच सूचित केले की माझ्या सर्व लिखाणास त्यांची मान्यता आहे. 
               रुपेरी बेट ह्या विस्तृतीकरणाचे उदाहरण आहे. स्वामींनी मला प्रथम सांगितले की त्यांनी ध्यानात दाखवलेले रुपेरी बेट म्हणजे वैकुंठ होय. ह्यानेच पुढे मुक्ती निलयम हे रूप घेतले, नंतर तेही बदलले. स्वामींनी सांगितले की मुक्ती निलयम म्हणजे भूलोक वैकुंठ आहे. 

रुपेरी बेट - वैकुंठ 

वैकुंठ - मुक्ती निलयम 

मुक्ती निलयम - भूलोक वैकुंठ 

                 काकभुशंडी ऋषींच्या नाडीत म्हटले आहे की मुक्ती स्तूप हे भूलोक वैकुंठ आणि स्वर्गीय वैकुंठ या दोहोंमधील पूल आहे. 

उर्वरित प्रकरण पुढील भागात ..... 

जय साईराम

ॐ श्री साई वसंतसाईसाय नमः 

सुविचार 

       " केवळ शुद्ध निर्विचारी मनोवस्थेमध्ये परमेश्वराचा खरा आवाज ऐकू येतो. " 

प्रकरण पाच 

चंद्र आणि मन 

                 त्यानंतर दररोज स्वामी माझ्याशी ध्यानामध्ये बोलू लागले. केवळ ध्यानातच नव्हे, तर कोणत्याही वेळी स्वामी माझ्याशी बोलतात. ह्या संभाषणाची मी माझ्या डायरीमध्ये नोंद करते आणि नंतर ते पुस्तकाच्या स्वरूपात प्रकाशित केले जाते. आतापर्यंत माझी ३१ पुस्तके प्रकाशित झाली आहेत. २० हुन अधिक पुस्तके लिहून पूर्ण झाली असून प्रकाशनाच्या वाटेवर आहेत. 
               माझ्या पहिल्या पुस्तकात स्वामी म्हणाले, " तू राधा आहेस. तू माझी शक्ती आहेस. या अगोदर मी स्वामींना ' अम्मा ' म्हणत असे. मग स्वामींनीच मला सांगितले, " तू राधा आहेस. तुझ्या स्वभावाला मधुरभाव भक्ती शोभते. तू ह्या मार्गाचे अनुसरण कर. "
               नंतर ते म्हणाले, " राधेच्या गहिऱ्या प्रेमामुळेच मी तुझ्यावर कृपावर्षाव करत आहे. आता तर तू माझ्यावर त्याहूनही अधिक प्रेमवर्षाव करत आहेस. तुझे हे ऋण फेडण्यासाठीच मी दुसरा अवतार घेईन. " 
               हे सर्व मी पहिल्या पुस्तकात लिहिले. स्वामींनी माझ्या पहिल्या पुस्तकावर स्वाक्षरी केली आहे. माझे पहिले पुस्तक हे इतर सर्व पुस्तकांचे बीज आहे. आता मी जे लिहिते, ते त्या पुस्तकातील मजकुराचे विस्तृतीकरण आहे. 

उर्वरित प्रकरण पुढील भागात ..... 

जय साईराम  

ॐ श्री साई वसंतसाईसाय नमः 

परमपूज्य श्री वसंतसाई अम्मा यांच्या ७८ व्या जन्मदिनानिमित्त 

' भगवत् प्राप्तीचा मार्ग प्रेम आहे. '

                    प्रेम हा भगवत् प्राप्तीचा एकमेव मार्ग आहे ; दुसरे कोणतेही मार्ग नाहीत. स्वामींनी हेच, " ईश्वर प्रेम आहे, प्रेमांत जगा." असे सांगितले . भगवान मूर्तिमंत प्रेम आहे. आपण सर्व त्याच्यापासून आलो आहोत, म्हणून आपण स्वतः प्रेम बनले पाहिजे. प्रेम नसेल तर जात, धर्म, देश, मी व सर्व माझे असे अनेक भेदभाव निर्माण होतात. माणूस विचार करतो; हे माझे आहे, ते त्याचे आहे. या संकुचित विचारांनी माणूस भिंती उभ्या करतो. अवघे विश्व, परमेश्वराचा महाल आहे. असे असूनही माणूस भिंती उभारतो, नावे देतो व म्हणतो हा माझा देश, तो तुझा वगैरे. एका घरात पुष्कळ खोल्या असतात; स्वयंपाक खोली, हॉल, झोपण्याची खोली, पाहुण्यांची खोली, आंघोळीची खोली वगैरे. माणूस स्वतःचे घर वेगवेगळ्या खोल्यांमध्ये विभागतो. अगदी तसेच तो परमेश्वराचा विश्व हा महाल सुद्धा विविध खोल्यांमध्ये विभागतो. हे विश्व भगवंताचा महाल आहे. प्रत्येक देश व प्रत्येक धर्म त्याच्या खोल्या आहेत. तथापि अशा भेदांमुळे प्रश्न उद्भवतात व त्यांची परिणती युद्धांमध्ये होऊ शकते. या लढायांमध्ये कित्येक जण धारातिर्थी पडतात. प्राण्यांमध्ये शत्रुत्वाची भावना असते; मानवात प्राण्यांचे गुण असतात. म्हणून प्रत्येकाने प्रेम व्हावे. जन्ममृत्यूच्या व्याधीला प्रेम हे एकमेव औषध आहे. लोक हो ! मायेतून जागे व्हा व सर्वांभूती प्रेम करा. तुमचे प्रेम तुमच्या मी व माझे या संकुचित भावविश्वात बंदिस्त करू नका. तुमच्या ' मी व माझे ' या भावामुळे तुम्ही ईश्वराच्या सुंदर महालाची तोडफोड करता. कोणी तुमच्या घराची जर नासधूस केली तर तुम्ही ताबडतोब पोलिसांना बोलावता. तुम्ही ईश्वराच्या महालाची नासधूस केलीत तर तुम्ही स्वतःलाच जीवनमृत्यूच्या चक्राच्या तुरुंगात टाकता. 
                श्रेष्ठ अवतार येथे आला, त्याने प्रेमाची शिकवण दिली. त्याने जागतिक कर्मे व पापकर्मे स्वतःच्या शरीरावर घेतली. या पृथ्वीवर कोणीही तुमच्या पापांचे भागीदार होणार नाहीत. रत्नाकराच्या जीवनावरून हे सिद्ध होते. प्रेम नसेल तर सर्व दुष्प्रवृत्ती आपल्याकडे येतात. या प्रवृत्तींमुळे निर्माण होणाऱ्या पापामध्ये तुमच्या कुटुंबातील कोणीही वाटेकरी होऊ शकत नाही. असे असूनही तो श्रेष्ठ अवतार अवतरला; त्याने तुमचे पाप व कर्म स्वीकारले. तुम्ही त्याचे उतराई कसे होणार ? या कर्माचे ऋण चुकविण्याचा एकच एक मार्ग आहे. आज तुम्ही तुमच्या कुटुंबाबाहेरील चार व्यक्तींवर अकृत्रिम प्रेम करायला सुरुवात करा. उद्या आठ जण. अशा तऱ्हेने तुमच्या प्रेमाचे वर्तुळ मोठे करत जा. तुमच्या कर्मांचा हिशेब चुकविण्यासाठी हा एकच एक उपाय आहे. 

जय साईराम !!  

Mukthi stupi - A short documentary  

      वरील documtantary बघण्याकरिता कृपया 'Mukthi Stupi ' यावर क्लिक करावे. 

ॐ श्री साई वसंतसाईसाय नमः 

सुविचार 

           " जोपर्यंत मनामधून पूर्णतः द्वैतभावाचे उच्चाटन होत नाही तोपर्यंत सत्याची पूर्णांशाने प्राप्ती होत नाही. "

  

प्रकरण पाच 

चंद्र आणि मन 

आशीर्वादात्मक ग्वाही .... 
                 १४ एप्रिल १९९६ रोजी स्वामी माझ्या ध्यानात आले आणि म्हणाले, " जरी प्रलय होऊन संपूर्ण विश्व लयास गेले अथवा सूर्य जरी पश्चिमेला उगवला, तरी मी तुला कधीही माझे विस्मरण होऊ देणार नाही आणि कोणत्याही कारणास्तव मी तुला कधीही अंतर देणार नाही. रडू नकोस. हे माझं सत्यवचन आहे." 
               असे म्हणत स्वामींनी माझ्या डोक्यावर हात ठेवला. 
               हे वचन स्वामींकडून मला १२ वर्षांपूर्वीच मिळाले. आता परत मी तेच मागत आहे. ह्या १२ वर्षांत अनेक घटना घडल्या. मी बरीच पुस्तके लिहिली मी ' प्रेम साई अवतार ' आणि ' भगवंताचे अखेरचे दिवस ' ही पुस्तके लिहिली. या पुस्तकांमध्ये मी माझ्या आणि स्वामींच्या मध्ये असणाऱ्या शाश्वत बंधाविषयी लिहिले आहे. तथापि आजही माझे मन भयग्रस्त आहे. ही भीती माझी पाठ कधी सोडणार ? 
               मला इथे एका गोष्टीचा उल्लेख करायचा आहे. मी बराच काळ स्वामींच्या प्रत्यक्ष दर्शनासाठी प्रार्थना करत होते. स्वामी मला सारखे विचारात, की  मी भौतिक देह आणि सूक्ष्म देह वेगळे का मानते ? त्यानंतर दि. ७ नोव्हेंबर १९९६ रोजी एका सोनियाच्या क्षणाने माझे जीवन उजळून टाकले. रात्री खूप वेळ मला झोप लागली नाही. शेवटी २ नंतर कधीतरी माझा डोळा लागला. मी गाढ झोपेत होते. अचानक माझ्या खांद्याला हाताचा स्पर्श जाणवला. मी तात्काळ डोळे उघडले, तो हात धरला आणि म्हणाले, " स्वामी ! स्वामी ! " मी पाहते तो काय स्वामी माझ्या बाजूला उभे ! मी हातात धरलेला तो दिव्य हस्त ! मी त्याचे हलकेसे चुंबन घेतले. स्वामींना माझ्या चेहऱ्यावरून हात फिरवला, माझे सांत्वन केले आणि एकाएकी अदृश्य झाले. काही क्षणांकरता का होईना, मला त्यांचे दिव्य दर्शन झाले. त्यांचे प्रत्यक्ष दर्शन घेण्याची माझी मनोकामना त्यांनी पूर केली. 

उर्वरित प्रकरण पुढील भागात ..... 

जय साईराम  

ॐ श्री साई वसंतसाईसाय नमः 

सुविचार 

  " त्यागामध्ये सत्याचे प्रकटीकरण करण्याचे सामर्थ्य असते. "

प्रकरण पाच

चंद्र आणि मन 

                  अहं चे वक्र विचार मनात शिल्लक असताना जर एखाद्याने आश्रम सुरु केला तर तो आश्रम शुचितेच्या तत्वावर आधारित नसेल. स्वतःला रिक्त न करता जर एखाद्याने अनुयायी गोळा करून आश्रम सुरु केला तर ती आध्यात्मिकतेचि विटंबनाच होईल. 
                केवळ अहंकाररहित मनावरच परमेश्वराची मालकी असते. भगवद्गीतेत अर्जुन श्रीकृष्णाला म्हणत, की एकवेळ वाऱ्यालाही नियंत्रण करता येईल पण मनाला नाही. 
                मन हे माकडासारखे असते. जर आपण मनावर पूर्ण नियंत्रण ठेवून ते परमेश्वराला अर्पण केले तरच अहंकाराचे अस्तित्व राहणार नाही. 
               माझ्या घरात अनेक चमत्कार घडले. लक्षार्चन करताना अनेक वनौषधी साक्षात झाल्या. त्यावेळी मदुराई आणि विरूधुनगर समित्यांचे अनेक भक्तगण उपस्थित होते. मी भयभीत झाले आणि स्वामींची प्रार्थना केली, " स्वामी, मला हे चमत्कार, ही गर्दी काहीही नको. स्वामी, मला तुमचे कधीही विस्मरण न्  होवो. जर मला तुमचे विस्मरण झाले तर तत्काळ मी देहत्याग करेन." 
                अशातऱ्हेने मी साश्रू नयनांनी सतत स्वामींची प्रार्थना केली. 

उर्वरित प्रकरण पुढील भागात ..... 

जय साईराम

ॐ श्री साई वसंतसाईसाय नमः 

सुविचार

" आपले अनुभव हे आपल्या भावविश्वाचे  प्रतिबिंब होय. "

प्रकरण पाच 

चंद्र आणि मन 

                  आता हे वाचल्यानंतर माझ्या मनात एक विचार आला. चंद्राची नेहमी मनाशी तुलना केली जाते. मन हेच बंध किंवा मुक्तीचे कारण आहे. जन्ममृत्यूचे  कारणही मनच आहे. मनात उमटणारे विचार आपल्या पुढील जन्मास कारणीभूत असतात. स्वामींनी मला चंद्र देणं आणि मी तो त्यांना परत करणं याचा गर्भितार्थ काय ? 
                 स्वामींनी मला दिलेले मन मी त्यांना परत केले. 
                 दि. १७ एप्रिल २००२ रोजी वसिष्ठ गुहेमध्ये स्वामी मला म्हणाले, " तू शुद्ध सत्वामध्ये माझ्याशी संयुक्त झालीस. तू आता एक आश्रम सुरु कर. " 
                 मी माझी इंद्रिये, बुद्धी, मन, अहंकार सर्व स्वामींना अर्पण केले आणि स्वतःला रिक्त केले. मी सर्वकाही शुद्ध करून त्यांना अर्पण केले. चंद्राच्या दृश्यातून हे निर्दशनास येते. 

उर्वरित प्रकरण पुढील भागात ..... 

जय साईराम

ॐ श्री साई वसंतसाईसाय नमः

सुविचार

            " परमेश्वराच्या भावामध्ये तादात्म्य पावलेल्या जीवाची एक छोटीशी इच्छा वैश्विकरूप धारण करते व त्यामुळे समस्त सृष्टी लाभान्वित होते. "

प्रकरण पाच

चंद्र आणि मन

                  दि. ७-५-९७ रोजी मदुराईच्या सुब्रमण्यम चेट्टियार यांच्या घरी स्वामींनी पुस्तकावर स्वाक्षरी केली. चेट्टियारांनी पुस्तकाची प्रस्तावना लिहिली . याच पुस्तकामध्ये मला ३० मार्च १९९६ रोजी दिसलेल्या दृश्याविषयी मी लिहिले आहे.
                 त्यावेळेस स्वामींनी मला विचारले...
                " मी तुला चंद्र आणून देऊ का ?  अचानक मंद प्रकाशित शीतल चंद्रमा त्यांच्या हातात आला. स्वामींनी तो माझ्या हातात दिला. तो एवढा मोठा होता की माझ्या दोन्ही हातात मावत नव्हता. त्यावर खाचखळगे होते. मी आकाशात दृष्टिक्षेप टाकला तर तिथे चंद्र नव्हता. अहाहा !  किती आनंददायी ! स्वामींनी माझ्या हातातून तो तेजस्वी चंद्रमा घेऊन परत आकाशात पाठवला. 

 उर्वरित  प्रकरण पुढील भागात  .....

जय साईराम

ॐ श्री साई वसंतसाईसाय नमः   

 सुविचार 

             " तुमच्या स्वभावातून तुमच्यामध्ये असणारा परमेश्वर प्रतिबिंबित होतो. " 

प्रकरण पाच 

चंद्र आणि मन 

               ज्यांनी अशा प्रेमाची अनुभूती घेतली असेल त्यांनाच माझ्या विरहाग्निचा ताप समजू शकेल. माझी आई लहानपणीच निवर्तल्यामुळे मी स्वामींना 'अम्मा ' म्हणून संबोधत असे. मी त्यांना मातृरूपात पाहून शेकडो पत्रे लिहिली आहेत . भावनावेग अनावर होऊन, मी हजारो काव्ये आणि गीतांच्या रूपात माझे भाव वर्णिले आहेत. मी नेहमी अश्रू ढाळत असे. काही काळानंतर स्वामी माझ्याशी ध्यानात बोलू लागले. ती संभाषणे म्हणजेच माझे प्रकाशित झालेले पहिले पुस्तक होय. 
७ मे १९९७ 
                   ' इथेच, याक्षणी, मुक्ती - भाग १ ' या पुस्तकाचे हस्तलिखित स्वामींच्या आशीर्वादासाठी मी मदुराईच्या श्री. सुब्रमण्यम चेट्टीयार यांच्या घरी ठेवले. स्वामी त्यांच्या घरी आले असताना त्यांचा मुलगा श्रीनिवास चेट्टीयार स्वामींना म्हणाले, " स्वामी तुमची सौ. वसंताबरोबरची संभाषणे पुस्तकरूपात लिहिली आहेत."
                  स्वामींनी ते हस्तलिखित चाळले व म्हणाले " ते तमिळमध्ये लिहिले आहे ." 
                 श्रीनिवास म्हणाले," हो स्वामी, तुम्ही त्यांच्याशी तमिळमध्ये संवाद केल्याने ते तमिळमध्ये लिहिले आहे."
                त्यावर स्वामी म्हणाले," खरंच, मी तिच्याशी तमिळमध्ये बोललो. ठीक आहे. मग मी आता काय करावे ?"
              " स्वामी, त्यांना तुमची स्वाक्षरी हवी आहे."
              स्वामींनी हस्तलिखित घेऊन त्यावर ' with love Baba ' अशी स्वाक्षरी केली आणि म्हणाले," बघा, मी हे अगदी मोठ्या अक्षरात लिहिले आहे." ह्या घटनेचा एक फोटो काढण्यात आला. तो त्या पुस्तकाच्या सुरुवातीला प्रसिद्ध केला आहे. 

उर्वरित प्रकरण पुढील भागात ..... 

जय साईराम